بسم الله الرحمن الرحيم

السلام عليكم ورحمة الله وبركاته وأهلا وسهلا بكم

اليوم اكتب لكم عن تجربتي الحاليه وهي الدراسه في معهد لغه انجليزيه في بريطانيا

في البدايه أنا أدرس في معهد بعيد عن البيت أروح له بالباص يعني المده تقريبا من يوم ما أطلع من البيت الين ما آصل للمدرسه أكثر من نصف ساعه تبدا الدراسه الساعه التاسعه والنصف وبما أن العادة جرت على أن يبدا دوامي أنا شخصيا الساعه التاسعه وخمسة وأربعين فلا يمكنني تغيرها لأنني بالرياض يبدأ دوامي سبع وربع ولذلك جوال الوالد كله رسايل من المدرسه الابن متأخر هذا اليوم عاد ما أتمنى إلى لو يغلطون برقم ويبدون ما يرسلون .

 عندنا حصتين في المدرسه الحصه الأولى تدرسنا وحده إسمها فرن والثانيه يدرسنا واحد تقل مهرج إسمه دوم كان عندي بالفصل خمس بنات وولدين أنا واحد منهم أربعه منهم فرنسين ووحده تركيه و وحده برتغاليه .

أذكر ذاك اليوم كان البرنامج رياضي ( كننا بالحلقه ) المهم كلنا قاعدين إلا التركيه عاد يوم تبقشت الأمور تبين لي إنها ماتبي تقعد على العشب تحس إن فيه حشرات بالنسبه لي ما أتمنى إلى أعكرفله .

ومره فيه فرنسيه معي بالفصل كل ما شافتني آكل بطاطس تقولي ممكن تعطين حبة بطاطس المهم طفشت منها فيوم من الأيام كان المدرس (دوم) ياكل موزه وكعادة الفرنسيه قالت له ممكن تعطين قسمه يعني يا جماعه فيه أحد ياخذ قسمة موزه بيده !!! المهم لعله زبدلها وقالها لا.

وأذكر بعد ذاك اليوم كان البرنامج طبخ فكان مقرر علينا نسوي كوكيز فودونا لمكان البوفيه اللي ناكل فيه الغداء فزي ما أنتم عارفين الكوكيز يبيله دقيق وسكر وزبده وأشياء ثانيه ناسيها فكنا نعجن على طاولات البوفيه الطاولات هاذي قبل الطبخ أنا والله ما أشتهي أحط عليها يدي من وصاختها والطلاب اللي يحط القدر فوق راسه وياخذ المغرفه ويحطها بيده كأنها مسدس فالدعوه كانت مطاريس فيوم شفت الدعوه مطاريس سرت زيهم ومطرست بس بالتأكيد ما أكلت وبصراحه استانست كثير بذاك اليوم الحمد لله .

وفي يوم آخر أيضا رحنا لمنجم فحم عمره مئتين سنه ومات فيه أكثر من مئتين شخص فلبسونا خوذة المهندسين ونزلنا بالمصعد مئة متر تحت الأرض فكانت الممرات ارتفاعها جدا جدا قصير فما دريت إلى راسي مشمع بالسقف يمكن صقع راسي ثلاث أو أربع مرات وصقعات قويه بس الصحيح كانت حلوه رحلة المنجم .

أذكر أيضا يمكن ثالث يوم لي في المعهد لقيت قيتار أي واحد يقدر يستخدمه المهم أخوكم فالله أول مره يشوف قيتار فقلت خل أشوف وش يسوي المهم مسكته دقيت فيه كم دقه فلقيت فيه علي الجنب شي تقدر تدوره فدورته أنا أخوكم فالله وقعد يدور يدور يدور مادريت إلى سمعت صوت ديييييييييييييييينق أثر الحبل إنفرط !!!!!!!! يعني خربت القيتار وش رايكم بإنكار المنكر بدون قصد. 

بس الحمد لله والشكر كانت التجربه جدا جميله شفت فيها ناس من جنسيات مختلفه عرفت عن طباعهم وحياتهم أكلهم هواياتهم تفكيرهم وبديت أفرق بين الجنسيات وخفة دمهم وحبابتهم

 في الختام أبارك لكم شهر رمضان

وإلى اللقاء …..