أخر العنقود … أصغر مدون سعودي
22 أكتوبر 2008 
تدوينة للأخ أبو يوسف حفظة الله
ــــــــــــــــــــــــــــــــــــــــــــــــــــــــــــــــــــــــــــ
بسم الله الرحمن الرحيم
السلام عليكم ورحمة الله وبركاته
أحيي جميع قراء المدونه
لي فترة أطلب من الأخ إبراهيم إني أكتب بالمدونه وبعد مشقة وعناء وافق مشكوراً ،لأن ودي أصير بهذه الموافقه أصغر مدون سعودي .
المهم قبل ما أكتب موضوعي فكرت عن إيش أكتب فبعد تفكير عميق قررت إني أكتب الموضوع عن موقعي في العائله وأني آخر العنقود
(المنصب) هذا له مميزاته وسلبياته
من المميزات إنك شوي تتدلع لا تفهمون غلط يعني هدية نجاح مثلاً ، أنام متأخر شوي ولا أحد يقول لي رح نم مثل باقي أصدقائي بس و بصراحه يعني من أحلى الأشياء اللي تجوزلي إلى قالتلي الوالده الله يحفظها وخليها آخر العنقود سكر معقود وإلا القعده حبه رعده لأنها حلوه من الوالدة.
من الإيجبيات اللي بصراحه صحيح صحيح حلوه إنك لا صرت بعزيمه ولا تعرف أحد تقعد مع اخوانك مهب يسير شكلك غلط لحالك أيضا بأيام الإختبارات تلقى أحد يذاكر لك ولو إني أنهاش كثيييييييييير من بعض الإخوان بدون ذكر أسماء بس عادي.
من السلبييات اللي بصراحه تقهر إنك إذا صرت قاعد مثلا وجنبي واحد من الإخوان وقالي أبو يوسف (يتمصلح) رح جبلي مويه وإلا أي شي ثاني.
يعني يا إللي منب قايل أنا قاعد جنبك ما تقولي ليش ماتقوم أنت وتجيب حاجتك يعني بس عشاني أصغركم !!!
ياجماعه المسأله مهب مسأله مقدره وعجز المسأله مسألة احترام وهذا من وجهة نظري إن الأمر هذا من السلبيات بالمجتمع الوالد الوالده الأقارب الكبار صح أجيبلهم ، لكن العجازين لا.
وبعدين لو كان تعبان عادي أجيب الشي بس مهب والواحد ما عنده شي ويبني أصير خدامة عند أهله . يا ناس هالحين صحيح قالو (أصغر القوم خادمهم) بس مهب بالشكل هذ يا خواني الأعزاء كلمه يجب أن تضعها بين عينيك(كما تدين تدان) حتى مهب بكر إذا صار عندكم عيال أوريهم العين الحمراء خلو العلاقه علاقة حبايب .
أيضا سلبيه أخرى مشكله كبيييييييييييييره ألا وهي إلا سار واحد من اخونك مستانس و عطاك كذا ظربه عالطاير وإلا قعد يستملح ونت مرررررررررررره مشغول تذاكر مثلا .
أيضا مشكله تجعلني أنقهر قهر غير طبيعي إذا صرت قاعد ألعب مع واحد من أخواني الكبار بالسوني وفزت عليه بعد جهد جهيد ثم يقول لي: أصلن أنا خليتك تفوز علي . ليش لأني قبل يوم كنت صغير كانو صحيح يفزوني أما هالحين أنا الي أفوز لأني مستواي تحسن.
وبعدين فيه مشكلة في بعض العوايل إن الصغير يصير ضعيف شخصية لأنه يربية مو أمة وأبوة بس ، حتى إخوانه يربونة ويصير ضغيف شخصية لأنه متعود كل الناس يهوشونة ، وهذا غلط بالمجتمع لازم الناس تنتبه له ، الحمد لله أنا ما عندي هالمسكلة لكن أشوف بعض العوايل عندهم هذي المشكلة .
وفي الختام أتمنى إني أكون قدمت لكم تدوينة ممتعة.وأتمنى إنكم تتقبلوني مدون معكم مع إني صغير في السن وإنشاء الله يصير عندي مدونة في القريب العاجل.
والسلام عليكم ورحمة الله وبركاته .
